Annwyl Gyfaill,
Fel y gwyddoch, mae ASA wedi bod yn ystyried cynigion i gynnwys myfyrwyr yn aelodau o’r timau adolygu sefydliadau yng Nghymru, fel rhan o ddull gweithredu strategol ehangach ar gyfer cynnwys myfyrwyr yn y gwaith o sicrhau ansawdd a gwella. Rwyf yn awr yn ysgrifennu atoch i roi gwybod i chi am y cynnydd diweddar gyda chynnwys myfyrwyr mewn adolygiadau sefydliadol ac yn natblygiad y strategaeth honno.
Ar 9 Hydref 2007, ysgrifennais at CCAUC, AUC, UCM Cymru, PCG a'r AAU yn gofyn am eu barn gychwynnol ar y datblygiad arfaethedig. Roedd fy llythyr yn nodi ein rhesymeg dros ystyried y datblygiad hwn ac amserlen ar gyfer ei weithredu. Ysgrifennais hefyd at y cyrff cyfatebol yn Lloegr a Gogledd Iwerddon am ddatblygiad tebyg yng nghyswllt archwiliad sefydliadol.
Mewn ymateb i’r ymgynghoriad ym mis Tachwedd 2007, cytunodd AUC, UCM Cymru a PCG â’r cynnig i gyflwyno myfyrwyr yn aelodau o dimau adolygu sefydliadau. Roedd CCAUC ac AUC ar y cyfan yn cefnogi'r cam i gael myfyrwyr yn aelodau o dimau adolygu sefydliadau, yn amodol ar ystyried rhagor ar faterion ymarferol a'r amod y dylid cyflwyno unrhyw newid o ddechrau'r cylch nesaf o adolygiadau sefydliadol.
Y materion a awgrymwyd ar gyfer cael trafodaeth bellach arnynt oedd:
- y rhesymeg dros y newid hwn
- pa effaith y mae myfyrwyr wedi'i chael ar dimau adolygu yn yr Alban a mannau eraill
- y berthynas rhwng cynnwys myfyrwyr ac adolygiadau cymheiriaid
- pa adnoddau y byddai eu hangen ar ASA i gyflwyno’r newid hwn
- maint y timau adolygu.
Mae Bwrdd yr ASA bellach wedi cael digon o amser i ystyried yr ymatebion a gafwyd a hefyd barn Pwyllgor Ymgynghorol yr ASA ar gyfer Cymru, ac mae wedi cytuno y dylid ymgynghori rhagor â’r sector am y materion pwysig hyn fel rhan o ddatblygiad y dull diwygiedig o adolygu sefydliadau yng Nghymru.
Yn y cyfamser, er mwyn helpu gyda'r broses, mae’r ASA wedi recriwtio a hyfforddi myfyriwr a fydd yn arsyllu ar adolygiad sefydliadol ac yn rhoi adborth i’r ASA am ei farn ef am y broses adolygu, gan ganolbwyntio'n benodol ar sut y gallai myfyrwyr, yn ei farn ef, gyfrannu orau fel aelod o'r tîm a hefyd roi sylwadau ar yr anghenion hyfforddi, gwybodaeth a sgiliau ychwanegol a fydd yn ofynnol. Bydd adborth oddi wrth y myfyriwr hwn ac o ymarfer tebyg yn Lloegr yn cael ei gasglu a’i ddadansoddi yn ystod Ebrill a Mai 2008.
Rydym hefyd wedi bod yn datblygu ein dulliau ehangach ar gyfer gynnwys myfyrwyr ac wedi bod yn gweithio gyda nifer o gyrff yn y sector i sicrhau bod ein strategaeth yn cyd-fynd â datblygiadau ehangach, ac yn canolbwyntio ar gefnogi'r gwaith yr ydych chi'n ei wneud yn y maes hwn. Mae drafft cyfredol papur sydd i'w gyflwyno i gyfarfod Bwrdd yr ASA ym mis Mawrth wedi cael ei bostio ar www.qaa.ac.uk/students, ynghyd â ffurflen adborth. Croesawaf unrhyw sylwadau y carech chi neu eich corff myfyrwyr eu gwneud.
Ysgrifennaf atoch eto pan fyddwn wedi cwblhau ein cynlluniau ar gyfer ymgynghori pellach.
Yn gywir
Peter Williams
Prif Weithredwr
Top